小資女上海美食行~

小資女上海美食行

小資女今次無端端去左上海玩，其實最主要嘅原因係為左係上海食!食!食!~~小資女一家都幾鍾意上海嘅食物架！例如：生煎包同小籠包咁喇∼仲試左幾間米芝蓮嘅餐廳~今日，我就為大家介紹一下小資女嘅上海遊之美食行既精華！

因為媽媽好喜歡吃生煎包，所以一到上海就同佢去食左先，等佢開心一下∼

1. 大壺春~~米芝蓮推介

狗狗努力包餛飩中~~

呢間小店係連鎖店嘅，係外灘附近已經有兩間分店∼

我地就去左雲南南路果間分店~

因為去嘅時候係下午三點~店舖入面無咩人~

睇下有咩食先∼

價錢非常親民∼∼

要先去櫃位落單然後就自取食物

餐具都係自助!!

小資女叫左兩份生煎包~一份有四件~分別係鮮肉生煎同大蝦鮮肉生煎~~

蔥花魚圓湯~

干張包粉絲湯

來個大合照先∼~

食評：由於小資女一家唔想食咁飽,影響晚餐食慾~所以都係淺嘗(食少少)~ 講返食物方面,當時係下午三點無咩人流,所以D生煎包都係一早整好......凍凍地(失望)......

鮮肉生煎比大蝦鮮肉生煎好食,魚圓好稔,唔似香港D魚蛋~

粉絲湯亦不過不失,所以小資女提議係-->去另外分店食

---> 上海黄浦区四川南路11号

小資女經過見到店舖大很多,人流亦多,應該可以食到新鮮出爐嘅生煎包~

呢餐只係食左35蚊人民幣~~都好經濟吓~哈哈~

• 大壺春(雲南南路店) 

• 
  

• 地址:上海雲南南路71號(近金陵東路)

2. 老北京前門烤鴨（外灘店）

跟住為大家介紹嘅並唔係上海菜，而係北京菜！（哈哈哈哈哈∼）

因為小資女係北京烤鴨控，上次同朋友去左北京5日食左3次烤鴨！今次難得北上到上海都搵機會食下烤鴨！

係小資女入住嘅Westin 酒店附近，比我搵到一間食京府菜嘅∼ 由酒店行過去大概係10分鐘路程∼

餐廳位於商業大廈內(感覺好殘舊嘅大廈)，要坐升降機上餐廳~~一入餐廳就變成左古典嘅中餐廳∼

餐廳傳統嘅中式建築風

餐廳都唔細∼ 但客人唔算多~

即叫即烤~~人嚟同我烤.........鴨~(小資女又發作)~

小資女一聲令下~大廚們即刻全部開工~~(老公心諗~夠啦老婆...你做多左啦)

好喇，咁快D睇下我地食左咩∼

見到師傅仔出現喇~

兩三下手勢就片好左小資女最愛嘅烤鴨∼

我地只係叫左一食~~每塊都好薄好脆~

烤鴨皮片得薄薄的, 蘸砂糖最好吃! 入口即溶!

鴨血小餛飩~~推薦~~好味!

翡翠肴肉~~好少見會連埋西蘭花~~如果唔點醬汁就無咩味~

清炒蘆筍~~清清地清下腸胃~唔錯~~

飄雪冰梅小排~都可以~

芥末鴨掌~~不建議選擇~

叫滿一枱~~開飯啦~

食評：餐廳環境幾好~人客都不會太多~可以靜靜地用餐~食物就不過不失~~又未到必定要試嘅地步~~哈哈~ 

呢餐消費左$640人民幣~

老北京前門烤鴨(外灘店) 

地址:河南南路1號星騰大廈(延安東路口)

3. 萊萊小籠

黎到上海梗係要食下小籠包架喇∼

小資女今次就黎到萊萊小籠~

呢間小店係南京步行街果度嘅，所以都算係方便嘅∼

小資女一家下午2點到~~入到去原來得幾樣野揀架咋~~好多野都售罄~~全部得返蟹粉類食物~

我地就揀左兩籠蟹粉小籠(32蚊人民幣)同一籠蟹粉蝦仁小籠(41蚊人民幣) ~~

蟹粉蝦仁大餛飩(37蚊人民幣)~

紫菜蝦皮湯(5蚊人民幣)~老公無端端話要飲湯~奇怪~

開餐啦~~

呢餐總共$156

食評：今次上海有收穫了~~小資女必食推介餐廳(下次來上海一定會再食)~~蟹粉小籠包皮薄多汁~又無腥味~小資女咁多年食過嘅小籠包頭一,二位~價錢亦唔貴~~而蟹粉蝦仁小籠比較貴~而又唔夠蟹粉小籠好食~(雖然都好好食)~建議點蟹粉小籠就夠~~其他食物都有水準~~突然好掛住D小籠包><嗚嗚~~

小籠包真係好好好好食！皮薄多汁！

任何時間都客滿~~大家要有耐性喔~

萊萊小籠

地址:天津路504號(近食品一店後門)

4. 傳承粢飯團

小資女係酒店附近見到有賣粢飯嘅地方∼口痕嘅我地又買黎試下∼

一間專做外賣嘅飯團店~

狸貓已經準備為我地點菜啦~

我地買左兩款，一款叫三兄弟飯團, 一款係梅菜笋絲飯團

簡單一個膠袋~袋住一舊飯!!

小資女好貪心揀左個三兄弟飯團~~全部材料都有~都係12蚊人民幣~~仲要係好食~好大個~

小資姐就揀左梅菜笋絲飯團~都唔差~飯團細三兄弟飯團一倍~價錢當然都平一半(6蚊人民幣)

食評：呢個價錢親民，粢飯大件夾抵食，味道也不錯！做早餐一流~~係一個小店嘅驚喜~

傳承粢飯團

地址:黃浦區廣東路280號

5. 南麓．浙里 （需要訂位）米芝蓮一星

呢間餐廳來頭唔細架，拎左米芝蓮一星架∼ 餐廳都係位於外灘附近∼ 由酒店行去都好近∼ 食完飯仲可以去外灘睇下夜景添!

餐廳門口好隱蔽~大家要留意呀~

下午5點半已經坐滿人~~(咁多人樣嘅~D動物樣去哂邊)

小資女就試左幾款菜式∼

先黎個龍眼做餐前小吃~哈哈好少見~

佛門素鵝~~好脆口~

正庄椒麻雞~~係呢個菜~小資女覺得可以飛走佢!!

干煸四季豆~~伴飯一齊食~~好開胃~

腐皮黃魚卷~~好正~一定要試!

炒年糕~~小資女話來上海一定要食炒年糕(老公會駁嘴話要食埋上海粗炒...小資女個頭就會出煙!!)

罐燜養身八頭鮑~

主角--八頭鮑魚~yeah~唔客氣啦~

有薏米, 南瓜, 百合等材料~都幾特別同個湯味道好夾!

宋嫂魚羹~~老公獨享~~味道都OK

米芝蓮一星都只係$689~~~

食評:餐廳環境一流~保留舊上海風格~小資女覺得好正~~餐廳嘅服務都好好~好細心~食物方面有返米芝蓮嘅水準~~唔係得個名~味道都好好~~價錢亦不是特別貴~~大家可以考慮下!

最可惜嘅係小資女食唔到餐廳出名嘅金牌扣肉…… 原來需要預訂架……唔係一樣....係好多招牌菜都要....小資女5點半到~大部份招牌菜已經無了~~(香菇喔)><

南麓.浙裡(外灘店)

位址: 四川中路216號(近福州路)

6.綠波廊~米芝蓮推介

中伏店---> 名過其實的綠波廊

小資女食過咁多餐上海美食都覺得好滿意，但到最後小資女中伏了…

小資女係好多年前同媽媽黎過一次上海，當時黎到豫園品嚐過南翔饅頭店嘅小籠包都覺得不外如是∼ 今次就想帶小資姐同老公去下豫園，睇下果到有無其他食店喇∼

我地就去左南翔饅頭店隔離嘅綠波廊∼

嘩~~多人到呢......右下角個小妹妹嚇到呆左

11點幾去到門口已經好多人∼ 原來佢地排緊外賣嘅小籠包∼

綠波廊外有得外賣蟹粉小籠包~~小資女記得係40人民幣有8隻!!

因為媽媽腳痛關係，小資一家決定上樓上食，等大家食得舒服D~ （注意：樓上雅座嘅消費比外賣高好多喔∼）

要準時上午11點先開門~

係門口等左20分鐘左右餐廳門口，我地就有位喇∼

第一次見有牛同猩猩出現!

睇睇菜單先~

餐牌上除左小籠包外，其餘嘅食物都好似廣東菜架∼∼∼ 所以我地只叫左以下幾款食物：

叫左兩籠翡翠鮮肉小籠包(60蚊人民幣6隻)~~食左1隻已經唔想食~

叫左兩籠蟹粉小籠包 (100蚊人民幣一籠12隻~~店舖排隊外賣40蚊人民幣8隻~)嘩~也差太遠了~
重點係...唔好食.....

大鑊...仲叫左兩籠...

葫蘆酥~OK~正常

眉毛酥~OK~正常~

我地消費左$458………有D貴....

食評：餐廳嘅蟹粉小籠包好厚~湯汁亦唔多~而翡翠鮮肉小籠包~更加可以用難食來形容~~建議大家想真係試下既就排外賣隊~便宜太多了~千萬~千萬~千萬(重要的事要講三次)~不要堂食~~

食物已經唔好食~~仲要坐路邊!動物們憤怒了!!

小資女要逃出綠波廊~~

綠波廊

地址: 城隍廟 豫園路115號豫園

小資女Facebook:

https://www.facebook.com/Camcamlife/